ऑनलाईन इंटरव्ह्यू देताय? मग तुमच्यासाठी ‘या’ काही खास टिप्स!

Use These Tips If You Are Giving Virtual Job Interview During Lockdown

ऑनलाईन इंटरव्ह्यू देताय? मग तुमच्यासाठी ‘या’ काही खास टिप्स!

अनेक क्षेत्र ऑनलाइन झाली असली तरीही व्हर्च्युअल मुलाखती देण्याचा अनुभव फारच कमी जणांना असतो. अशा वेळी गोंधळून जायला होतं. आत्मविश्वास न गमवता व्हर्च्युअल मुलाखतीला सामोरं कसं जाता येईल याच्या टिप्स…

सध्या अनेक कंपन्यांनी ऑनलाइन मुलाखती घ्यायला सुरुवात केली आहे. अनेक क्षेत्र ऑनलाइन होत असतानाच नोकरीसाठी अर्ज केलेल्या उमेदवारांच्या मुलाखतीसुद्धा व्हर्च्युअली घेण्यात येत आहेत. व्हर्च्युअल मुलाखतींचा अनुभव नसल्यामुळे या मुलाखती देताना काहीसा गोंधळ उडू शकतो. अशा वेळी गोंधळून न जाता व्हर्च्युअल मुलाखतींना यशस्वीरित्या कसं सामोरं जाता येईल याच्या काही टिप्स जाणून घेऊ या…

पाया असू द्या पक्का

कोणत्याही मुलाखतीला सामोरं जाण्यापूर्वी काही प्राथमिक गोष्टी पक्क्या करणं आवश्यक असतं. पाया पक्का असला तर पुढील सर्व गोष्टी सुरळीतपणे पार पडण्यास मदत होते. पाया पक्का करण्यासाठी कंपनीची माहिती, कंपनीसंबंधीत विविध बातम्या, तेथील कर्मचाऱ्यांनी दिलेले ऑनलाइन रिव्ह्यूज यासारख्या गोष्टींची माहिती करून घेणं आवश्यक आहे. तुम्ही संबंधित कंपनीमध्ये नोकरी करण्यासाठी का इच्छुक आहात हेसुद्धा सांगणं गरजेचं आहे. त्यासाठी पूर्वतयारी करणं गरजेचं आहे. या सर्व गोष्टींसोबतच तुमचा सीव्ही योग्य आणि अपटूडेट आहे की नाही याची खात्री करून घ्या.

निवडा योग्य जागा

ऑनलाइन मुलाखतीला सामोरं जाताना योग्य जागा निवडणं गरजेचं आहे. जागा निवडताना प्रकाश आणि बॅकग्राऊंड या गोष्टींची योग्य निवड करणं आवश्यक असतं. मुलाखत देण्यासाठी बॅकग्राऊंड स्वच्छ असलेली जागा निवडा. बॅकग्राऊंड मुलाखतकाराचं (मुलाखत घेणाऱ्यांचं) लक्ष विचलित करणारी नसेल याची दक्षता घ्या. मुलाखत देताना कॅमेरा तुमच्या समोर असू द्या. योग्य, प्रोफेशनल आणि आत्मविश्वास वाढेल असा पेहराव करा. मुलाखत देताना लक्ष विचलित होईल असं वाटत असेल तर खोलीचा दरवाजा बंद ठेवा. जेणेकरून, तुम्ही पूर्णपणे मुलाखतीवर लक्ष केंद्रित करू शकाल.

सामना तांत्रिक अडचणींचा

मुलाखत देताना तांत्रिक अडचणी येण्याची शक्यता नाकारता येत नाही. मुलाखत देण्यापूर्वी तुमच्या घरातील वायफाय योग्य प्रकारे सुरू आहे का आणि त्याचा स्पीड योग्य आहे याची खात्री करून घ्या. तुमचा लॅपटॉप पूर्णपणे चार्ज करून घ्या. मुलाखत देताना फोन तुमच्या जवळच ठेवा. फोन जवळ ठेवण्यापूर्वी तो ‘डू नॉट डिस्टर्ब’ मोडवर असेल याची खात्री करा. जेणेकरून काही तांत्रिक अडथळा आलाच तर मुलाखत घेणाऱ्या किंवा मुलाखतीसंबंधित व्यक्तींशी संपर्क साधता येईल.

सराव करा

व्हर्च्युअल मुलाखत देताना मुलाखतकारांचे प्रश्न नीट ऐका आणि घाई न करता त्यांची योग्य उत्तरं द्या. मुलाखत देताना ताठ बसा. प्रत्यक्ष मुलाखत देण्यापूर्वी तुमच्या मित्र-मैत्रिणींसोबत व्हर्च्युअल मुलाखतीचा सराव करून पाहा. जेणेकरून, तुमचा आत्मविश्वास वाढेल आणि मुख्य मुलाखतीच्या वेळी गोंधळ उडणार नाही. मुलाखत झाल्यानंतर संबंधित व्यक्तीला आभार मानणारा मेल पाठवा.

आत्मविश्वास गमावू नका

मुलाखतीदरम्यान तुमच्याकडून अनावधानाने काही चुका झाल्या असतील किंवा ‘हा मुद्दा आणखीन प्रभावीपणे मांडता आला असता’ असं वाटल्यास त्या सर्व गोष्टी लिहून ठेवा. त्या गोष्टी पुढील मुलाखत देताना लक्षात असू द्या. तुम्ही घरूनच मुलाखत देत असल्यामुळे काही समस्या येणं स्वाभाविक आहे. याची मुलाखतकारांनासुद्धा कल्पना असते. त्यामुळे अडथळा आल्यास घाबरून जाऊ नका.

1 Comment
  1. Dinesh T paik says

    Dinesh T paik

Leave A Reply

Your email address will not be published.

व्हाट्सअँप ग्रुप जॉईन करा!